الغيره عند الاطفال 👼
،
،
الغيره سلوك طبيعي فطري بالطفل ، ويبدأ من الشهور الاولى ويبان بحبه لتملك امه لانه وجودها يحسسه بالامان والتوازن العاطفي ، وفقدانها ضياع وخوف وتوتر
،
،
ولهالسبب هو حريص على امه ويخاف من فراقها
لانها شي ثمين بالنسبه له
وتبدأ سلوكيات الغيره بعد وجود طفل جديد في حياتهم
،
،
وبعلم النفس الغيره من الاخوان تسمى ( عقدة ست )
ومهما حاول الطفل يخفي مشاعره اتجاه هالمحتل الجديد
( المولود👼) تبان في تصرفاته وسلوكياته ومحاولاته بالحفاظ على مكانته بالأسره ومحاربة كل من يحاول ياخذ مركزه المميز ، وينقله من مركز الاهتمام الى زاوية الاهمال او الاهتمام بالدرجة الثانيه
،
،
جهاز التحكم بمستوى الغيره بيدك انتي ،📱خوفك الشديد على المولود الجديد وحرصك عليه يشعل فتيل الغيره ،👶، استبعاد الطفل الكبير من غرفتك ومن اهتمامك يحسسه ان غير محبوب
،
،
،
لتفادي ظهور الغيره 👼👦
بفترة الحمل الاخيره هيئي طفلك لاستقبال اخو جميل مثله وخذي رايه في تجهيزاتك للبيبي ،
جهزي هديه قبل ولادتك وعطيه بعد ولادتك هديه من اخوه اللي يحبه 👼
تذكري ان البيبي مايفهم وان الكبير يفهم ويحتاجك اكثر من الصغير
خليه يشيل اخوه ويحضنه ويمسك يده تحت اشرافك ،،🙇
،
قولي له انت حبيبي وولدي الكبير اول فرحتي ، احضنيه وريه صوره وهو صغير وكيف كنتي انتي تلبسينه وتغيرين له لانه مايقدر يسوي شي لحاله والحين انت رجال كبير ماشالله تلبس لحالك وتتكلم ، اذا يبي يبوس اخوه وهو نايم قولي له لا خله ناااايم عشان انا ابي انبسط معك واسولف معك الحين بيصحى ويزعجنا وانا ابي اقعد مع حبيبي الكبير 💞
حسسيه بالثقه قولي ممكن تساعدني نسوي رضعه لاخوك خليه يصب المويه بالرضاعه ،🍼 وانتي شايله البيبي ترضعينه سولفي معه لا يحس انك لاهيه عنه ،،
قولي بكره يكبر اخوك وتصير انت اكبر وعندك عضلات وتحمي اخوك وتعلمه ويصير يحبك وتلعبون سوا ،
،
،
وصي زوجك ان الاهتمام بالكبير والسؤال عنه اول مايدخل البيت ،، 👦 👨
،
،
الحين بنتكلم عن الطفل اللي يغار من اخوه ويضربه ،
واللي تغيرت كثير من سلوكياته بعد ظهور الطفل الجديد
👼👦
مظاهر الغيره وعلاجها :
١ _ العنف والضرب
انتبهي تعاقبين الكبير اذا ضرب الصغير ، العقاب بيزيد كراهيته وغيرته لأنه تعاقب بسببه ، والصح انك تحتوينه واحضنيه شبعيييه حنان وبيني له مكانته عندك وحبه بقلبك
وتكلمي معه بهدوء انك لما كنت انت بعمره كنت ما اسمح لأحد يضربك لانك حبيبي واخاف عليك من كل شي وحتى الحين ما اسمح لأي احد يضربك ويزعلك
،
،
٢_ النكوص
النكوص معناه ان الطفل يرجع بيبي ويبدا بحركات الرضع ويطالب برضاعه ويتكلم بكلمات اطفال ويطلب منك تشيلينه وتأكلينه ،، وبعضها يشتد ويوصل لحالة التبول اللاإرادي
كل هذا عشان يلفت انتباهكم ،، احضنيه وطاوعيه عطيه رضاعه كلميه كنه بيبي
وبين له من خلال كلماتك انك تحبينه وهو كبير رجال يسولف معك ويساعدك ، وابيك لما تنام بحضني تحكي لي قصه واحكي لك ،، وبيني له حبك وفرحتك انه كبر مو بيبي يتعبك زي اخوه ،، انتبهي من نهيه عن هالفعل اللي بيزيد حالته
،
،
٣_ السب والتخريب
بتزيد كل ردات فعله بالايام الاولى من وجود المولود سب تخريب بكاء عناد صراخ يضرب نفسه ، استعراض ولفت انتباه ، تجاهلي اي تصرف يستفزك ، كثري من كلمات الحب حبيبي ليه يبكي ، عيون ماما ليه يصرخ ، واحضنيه لين يهدا
،
،
٤_الصمت واصفرار وانعدام الشهيه
هذي اصعب الحالات اللي تضر طفلك لانه يكبت مشاعره
والغيره تاكل قلبه ولا يعبر عنه الا بالصمت
لا تتجاهلين هالحاله لانها بتزيد مع الوقت وتنقلب الى عدوان يصعب عليك علاجه
،
،
العلاج لكل الحالات هو الاحتواء والحنان والحب وتبين له انه الطفل الكبير المميز اللي اخوه يحتاجه ويحبه ، وبنفس الوقت بيني له ضعف الصغير وحاجته لك ولأخوه لانه مايقدر ياكل بنفسه ولا يلبس بنفسه ولا يتكلم ولا يتحرك
علقي قلبه بأخوه من خلال حبك وكلماتك ❤️
،
،
نصيحه ❤️تذكري ان الغيره شعور طبيعي ، وان تفضيل طفل على الاخر يولد الغيره والكراهيه والرغبه بالإنتقام
وبالقران الكريم نماذج كثيره✨ قصة قابيل وهابيل و قصة يوسف عليه السلام مع اخوانه ،
اخيراً 👐 اللهم آلف مابين قلوبهم واحفظهم واجمع كلمتهم يارب العالمين ❤️
